Ретки се местата каде што на толку мал простор се концентрирани најразлични природни убавини како што е случајот со Реканскиот предел.
До селото Битуше се пристигнува по тесен и стрмен планински пат, кој поминува низ Ростуше. А на неколку километри оттука низ густата шума се наоѓа и глацијалното езеро Локув, едно од најниските леднички езера во Македонија. Интересен простор за еднодневна посета, но и за кампување и за уживање во прекрасната природа. Вистински предизвик за вљубениците во природните убавини.
Патеката почнува од храмот „Св. Кирил и Методиј“, скит на Бигорскиот манастир, кој требало да функционира како летна школа за веронаука на млади во Македонија.
Погледот недвојбено ќе ви застане и на огромните карпи горе кон Крчин. Како куриозитет, токму во тој правец се наоѓаат остатоците од некогашна црква. Интересно е што влезот од некогашната црква се наоѓа на албанска територија, додека олтарот е на македонска страна. Според кажувањата на монасите, големиот христијански празник Преображение Христово до пред осумдесетина години се одбележувал со искачување на голем број верници од двете страни на планината Крчин и со заедничко чествување на врвот, на 2.341 метар надморска висина. Од 2016 година, на иницијатива на братството од манастирот „Св. Јован Бигорски“ повторно се враќа традицијата на посета на црквата.
Но, патеката кон глацијалното езеро е значително поблага и полесна од искачувањето на Крчин. Локув, крајната дестинација од ова планинарење, е најпознатото од дешатски леднички езера. Движејќи се низ буковата шума, вниманието постојано го одвлекуваат соседните планини и доминантни врвови.
По враќањето на почетната точка, храмот „Св Кирил и Методиј“, со превоз се продолжува кон село Ростуше. На самиот влез во селото се наоѓа и почетокот на патеката што води до еден од најубавите водопади во државата. Водопадот Дуф е висок 28 метри, а пристапот до него е по обележана пешачка патека во должина од малку повеќе од еден километар. Движењето е по кањонот на Ростушка Река, каде што е посебно впечатлива длабочината на кањонот, но и големата температурна разлика, посебно во летниот период. На крајот на кањонот се наоѓа карпа низ чијшто процеп истекува вода во импозантна и моќна глетка. На делови од патеката може да го забележите импозантниот Бигорски манастир, а многумина, можеби, за првпат ќе го видат од оваа перспектива.
На крај, планирана е посета на Бигорскиот манастир и на „Куќа на Мијаците“, ресторан и вистински музеј на целиот регион.
Забелешка: Почетна точка на турата е Маврово. Турата вклучува организиран превоз до село Битуше. Планинарската патека од храмот „Св. Кирил и Методиј“ над село Битуше до местото Локув е во должина од околу осум километри во двата правци. Патеката од село Ростуше до водопадот Дуф е во должина од два километра во двата правци.
Маврови Анови
08:00
