Крушевско наследство

Крушевско наследство ќе ве запознае со најскриените тајни на Крушево и ќе ви докаже дека сте знаеле премалку за овој град, кој изобилува со наследство и со богата традиција.

Турата почнува со посета на црквата „Свети Никола“.  Одличната лоцираност на црквата и близината на чаршијата – епицентарот на трговијата и на занаетчиството, довела до адаптирање на камбанаријата и во саат-кула. Редок архитектонски примерок. Поставеноста на часовникот на највисоката кула овозможува видливост од секоја страна од градот. Тие што немаат страв од висина може да се качат и да го доживеат единствениот поглед кон градот.

Посетата на Галеријата на Никола Мартиноски е уникатен начин на запознавање со ликот и делото на еден од најистакнатите македонски современи сликари. Во музејот се изложени неговите најпознати дела и прекрасни репрезентативни примероци од типична влашка и македонска народна носија. Крушевската одаја од XIX век ќе ве врати две столетија назад.

На само стотина метри се наоѓа и следната црква „Свети Јован“, позната како влашка црква. На горниот кат, скриена од очите на јавноста, ќе ја видите галеријата на икони и целиот алат за работа на Константин Зографот од Крушево. Иконостасот е вистинско ремек-дело, работено со огромна љубов цели четири години, според кажувањата на локалното население, повисок е и од тој во Бигорскиот манастир.

Дали некогаш сте биле во традиционална крушевска куќа?

Крушевската куќа е специфична симбиоза на влашката и на мијачката уметност во градењето. Еден од ретките описи на крушевската архитектура ќе пронајдете во спомените од Никола Киров – Мајски. Куќите на Нешковци, Фундовци, Таховци и други биле од понов тип. Значителен дел од куќите биле бомбардирани и уништени за време на задушувањето на востанието.

За среќа, куќата на Нешковци не била уништена за време на востанието и оваа тура нуди посета токму на оваа куќа. Семејството на баба Севастула, скратено Сика, сопственичка на куќата, ја купило од Нешковци за кои вели дека биле многу богати. Куќата импресионира уште на прв поглед со малата стара дрвена порта, која зад себе ја крие грандиозната зачувана убавица во жолта боја, со многубројни дрвени прозорци во стилот на влашката архитектура. Како и влашката црква „Св. Јован“ во Крушево, така и оваа куќа била ѕидана со врел вар што ја прави многу цврста.

Гостопримливите домаќинки облечени во стара градска традиционална облека ќе ве катапултираат назад во времето. Таму ќе ве чека и богато распослана трпеза со традиционални крушевски и влашки јадења како гурабии, лаптука, крофни, питулици со лук и со кисело млеко и овчо сирење, локум, домашно приготвено слатко, кафе, вода. Сето тоа послужено во уникатен градски влашки амбиент.

Освен тоа, ќе имате можност да ги чуете и тајните на месењето, пренесени од највештите крушевски жени во чиишто мајстории сами ќе се уверите. Ќе научите за што служат сукалото и тарунот, а ќе се зачудите што најважната тајна „состојка“ на превкусните месени работи, всушност, не е состојка, туку правењето крст со раката на брашното пред да го почнете месењето.

Логистички информации: Движењето низ градот е пеш и е подобно за сите возрасти, а турата трае околу шест часа.