Најубавиот поглед кон Охридско езеро

Сакате ли да го видите Охрид од висина и да го доживеете најубавото зајдисонце движејќи се по Галичица?  

Стартот на турата е од село Горно Коњско до кое се пристигнува со организиран превоз. Самата остра нагорнина навестува дека се искачувате прилично високо и веќе почнува возбудата од самата замисла каков неверојатен поглед ќе понуди ресторанот „Тераса Утарна“. Сместен е на 1.100 метри надморска висина, на место што меѓу селаните е познато како Утарна, по што и го добил своето име. И, навистина, ви нуди неверојатен поглед кон Охридско Езеро и Охрид каков што досега не сте виделе. Изграден е со многу љубов од гостопримливите домаќини, кои ќе ве примат како во своја куќа. Многу поинаку од масовниот туризам што се нуди неколку километри подолу. „Тераса Утарна“ совршено се вклопува во локалниот амбиент. Успешната комбинација на дрво и на камен, заедно со декорациите од ретро и од етномотиви, е совршена. Убавиот ентериер комбиниран со прекрасната околина и со единствениот мир нудат уживање во речиси сите убавини што може да ги даде природата. Покрај тоа, сета понудена храна и пијалоци се домашно подготвени. Ќе имате можност да пробате многу јадења од домашната традиционална охридска кујна. По дегустацијата на храна и на пијалоци се почнува со лесно движење по сртот на Галичица.

Шипокно е селото низ кое води патеката. Старите веќе напуштени камени куќи се посебно интересни во пролет, кога цвета јоргованот, кој го има многу во селото. Патеката поминува покрај преубави лозови насади, а во зависност од годишното време, може да се пробаат и питоми и диви овошки, кои ги има по должината на патеката.  

Пред село Велестово е новоизградената црква „Рождество на Пресвета Богородица“ во чијшто двор ќе биде направена кратка пауза. Оттука патеката продолжува под село Велестово, со константно благо спуштање. Погледот е единствен. На дланка е целиот Охридски регион, а со приближувањето кон Охрид, кој се наѕира низ попатните дрвја, се забележуваат и сите негови знаменитости. Пред сѐ „Св. Јован“ на Канео, Плаошник, Старата чаршија, а убедливо најдоминантна е Самуиловата тврдина. Нејзината импозантност може најдобро да ја забележите токму од оваа тура. Во правец кон тврдината, пак, на соседниот рид, познат како Габавски Рид, е локацијата каде што веднаш над православната црква „Свети Еразмо“ се наоѓала Енхелана. Некои уште ја нарекуваат и македонската Микена поради киклопските ѕидини, кои се делумно зачувани.

Турата ви нуди незаборавен ден. Перфектна комбинација на традиционална македонска храна и пијалаци, умерена физичка активност и најубав поглед кон најголемиот македонски бисер, Охрид со Охридско Езеро.

А најдоброто од сѐ е што по завршувањето на турата, по препорачаната дневна доза физичка активност и благиот замор, имате можност да се разладите во свежите води на Охридско Езеро. Уживање за сите сетила.

Забелешка: Почетна точка на турата е Охрид. Турата вклучува организиран превоз до село Горно Коњско. Планинарската патека е со должина од околу 10 километри. Потребна е средна физичка подготвеност и соодветна облека и обувки. Просечното време за планинарење изнесува три часа.