Ледена прошетка – Вевчани и Вевчанско езеро

Дали знаете дека на само 15-ина километри воздушно растојание од Охридско Езеро се наоѓа едно од најубавите леднички езера во земјава? Тоа е Вевчанско Езеро, кое лежи на Јабланица,  планината по чијшто срт се движи граничната линија со Албанија и кадешто има уште три постојани леднички езера.

Почетната точка на турата е село Горна Белица, село што некогаш било со доминантно влашко население, а денес нема постојани жители. Планинарската патека кон езерото води низ исклучително богата букова шума, а се потребни околу 2,5 часа за да се стигне до езерото. Поголемо од фудбалски терен, без жив свет, опкружено со необични камења во црна боја и со вкусни малини – тоа е Вевчанско Езеро над кое се извишува највисокиот врв на Јабланица, Црн (Церн – на вевчански дијалект) Камен, висок 2.257 метри. Звучи, навистина, привлечно да се одмориме и разладиме по „долгото“ пешачење, нели?

Но, не можеме да останеме тука засекогаш. По краткиот одмор, се спуштаме назад до селото и тоа што следува е изненадување за сите сетила. Во локален амбиент, дегустираме традиционална храна… месени пити, пинџури, сирења… уживаме и се насладуваме.

Наша последна дестинација е село Вевчани. Знаете ли дека во близина на Вевчани поминувал познатиот пат Виа Игнација, главната артерија што го поврзувала Рим со источните делови на империјата?

Прво, ги посетуваме познатите Вевчански Извори. Како што наближуваме до нив, така станува сè постудено, но вас сè уште ве грее восхитот од веќе виденото. Главниот извор избива од пештерски канал, а штедроста на изворите создала одлични услови за функционирање на воденици, кои во минатото ги имало околу 30 на број. Една од нив сè уште е во функција, а внатре ќе се запознаете со начинот на работа на воденицата, што е особено интересно да се доживее.

Следува посета на црквата „Свети Никола“ во центарот на селото, каде што се наоѓа фреската во форма на триаголник со око во средината што веднаш ќе ве наведе да помислите дека станува збор за масонскиот симбол.  Во прилог на тврдењата дека, навистина, станува збор за масонскиот симбол одат и низа приказни за постоење вевчански печалбарски семејства, членови на масонски ложи, кои на овој начин сакале да ја искажат својата моќ и постоење. Од друга страна, овие тврдења се демантираат со ставот дека тој симбол е, всушност, „окото што гледа сè“, христијански симбол на светото тројство.  Но, која е вистината?

Како сувенири од посетата на „републиката“ може да понесете вевчански пасош или банкноти, кои, секако, не се во употреба.  Како сувенир ќе понесете и интересни податоци во врска со познатиот Вевчански карневал, кој се одржува во јануари, означувајќи го доаѓањето на новата година според стариот календар. Традиција постара од 1.400 години и голема културна и историска вредност. За крај, како сувенир ќе понесете восхит, свеж дух и желба да дојдете повторно во Вевчани.

Логистички информации: Почетна точка на турата е село Вевчани. Турата вклучува организиран превоз до Горна Белица. Планинарењето од Горна Белица до Вевчанско Езеро е во должина од околу шест километри во правец и се совладува висинска разлика од 600 метри. Времетраење на турата е околу шест часа.