Галичник – местото во кое е собрана цела македонска убост, природната убавина, специфичната архитектура, носија, музика, обичаи…
Единствениот асфалтиран пат до село Галичник води низ националниот парк Маврово, покрај самото Мавровско Езеро. По патот се впечатливи споменикот на педесет и двајцата градежни работници, кои го загубиле животот во снежната лавина во 1956 година, при градењето на мавровскиот хидроенергетски систем, браната, а горе и прекрасниот поглед кон Мавровско Езеро, понорот Тони Вода, врвот Меденица…
Селото е сместено на природен чардак, а центар на селото е црквата „Св. Петар и Павле“ во чијашто непосредна близина се наоѓа и амфитеатарот пред кој се одржува дел од познатата манифестација Галичка свадба. Галичката свадба се одржува секоја година на Петровден и е еден од најбитните настани поврзани со негувањето на македонскиот идентитет, преку запознавање на новите генерации со заборавените адети, прекрасната музика на Мајовци и неизбежните зурла и тапан, најдобрата македонска носија и најпрепознатливото македонско оро „Тешкото“.
Можеби најдоброто место за одмор и за уживање во огромното пространство што се отвара пред Галичник е хотелот „Неда“, од каде што при ведро време погледот допира и до Дебарско Езеро. По кафе-паузата во хотел „Неда“ се спуштаме кон селото Јанче. Патеката овозможува пристап и поглед кон еден од најубавите предели во националниот парк. Парк, чијшто симбол е балканскиот рис, срамежливото животно, кое, за жал, се наоѓа на работ на истребување.
По околу два часа пешачење се пристигнува до селото Јанче, а тоа што го прави атрактивно за посета е зачуваната традиционална архитектура. Селото се наоѓа од левата страна на река Радика, додека доминантниот дел од селата се наоѓаат од спротивната страна.
Од Јанче тргнуваме во посета на најпознатиот верски христијански храм, манастирот „Св. Јован Бигорски“, изграден во XI век. По трагедијата во 2009 година, која остана како болно сеќавање, манастирот воскреснува во прекрасен храм. Денес манастирот доби сосема нов лик и прерасна во едно од најубавите христијански светилишта во целиот регион. Импресивен иконостас изработуван шест години, мошти на св. Јован Крстител, св. Климент Охридски и други светители…
Непосредно под храмот се наоѓа етноресторанот „Куќа на мијаците“, целосно изграден во духот на традиционалната мијачка култура. Тука, се насладуваме со храна што ја нема никаде на друго место: манастирски леб, комитска сабја, пченкарна мазница, галички смок, ќаин мерак… изборот е тежок
Логистички информации: Почетна точка на турата е Маврово. Турата вклучува организиран превоз до Галичник и до манастирот „Св. Јован Бигорски“. Движењето од Галичник до Јанче е спуштање за околу 700 метри висинска разлика. Потребна е добра физичка подготвеност и соодветни високи обувки. Поради големата надморска височина од околу 1.700 метри, патот кон Галичник не е прооден во зима.
Маврови Анови
08:00
