Дом на видрите – Белчишко блато

Многу е тешко човек да добие слика за географските карактеристики на еден реон од пред неколку милиони години. Но, Сини Вирој, малиот реликт од дамнешното Десаретско Езеро, може за момент да потсети за изгледот на Дебрца пред пет милиони години. Белчишко Блато или, според неговите сини води, познато и како Сини Вирој, е едно од најголемите преостанати блата во Македонија. Се наоѓа на надморска височина од 760 метри во подножјето на Илинска Планина, под нејзиниот западен разгранок Габер.

Блатото е посебно интересно и поради поплавените евлови шуми. Петкилометарската патека покрај преубавите вирови и изворчиња со вода е идеална за рекреативно-туристички активности во природа. Погледот кон реката Матица, чиишто води завршуваат во Охридско Езеро, е фантастичен. Интересно е што во ова блато живее најмногубројната популација видри (Lutra lutra) во Северна Македонија, вклучена во категоријата на глобално загрозени видови. Поплавеното подрачје е идеална средина за овој исклучително вешт пливач, кој се храни со риби, ракови, жаби и со водни инсекти. Пределот долг период беше живеалиште и за биволот, кој ги сака реките и влажните низини. За жал, денес го нема, а како спомен за опстојувањето на ова моќно животно, кое најчесто се користело за транспорт и за орање, останаа роговите закачени на дел од куќите во овој предел

Оваа тура нуди уникатна можност за запознавање со богатата македонска традиција. Од Белчиште потекнува најпознатиот мајстор за изработка на традиционални музички инструменти, гајди и тапани. Тука ќе научите за специфичниот начин на нивната изработка, но и изворно ќе го слушнете нивниот звук.

Продолжуваме кон единствениот манастир во државата што е посветен на сите светци. Лоциран во близина на селото Лешани, манастирот познат како „си свети“ нуди рај на земјата, уживање и душевен спокој. Над манастирот има густа дабова и габерова шума, а под него плодно поле.

Ќе дознаете повеќе и за чудата на манастирот, исцелувања, имање пород, но и за чудото што се случи во 2004 година, чијшто сведок е отец Вартоломеј. Ќе чуете и за легендите за еден од најопеаните македонски народни херои, кој е родум од овој крај, Кузман Капидан.

Логистички информации: Почетна точка на тргнување е Охрид. Турата вклучува организиран превоз до/од село Белчиште. Турата е подобна за сите возрасти.